Up in the morning early

Cauld blaws the wind frae north to south,

The drift is driving sairly,

The sheep are couring in the heugh,

O! Sirs, 'tis winter fairly.

Now up in the morning's no for me,

Up in the morning early;

I'd rather gae supperless to my bed,

Than rise in the morning early.

The sun peeps o'er yon southlan' hills,

Like ony timorous carlie,

Just blinks a wee, then sinks again,

And that we fin' severely.

Now up in the morning's no for me,

Up in the morning early;

When snaw blaws ben to the chimly cheek,

Wha'd rise in the morning early?

A cosey house, and canty wife,

Are blessings late an' early;

A pantry stow'd wi' meal an' maut,

It answers unco rarely.

But up in the morning, na, na, na!

Up in the morning early;

The gowans maun glent on bank and brae,

When I rise in the morning early.