Quant de vous seul

Quant de vous seul je pers la veue

De qui tant chiere suis tenue

Mon mallors si tresfort m'assault

Qu'a peu que le cuer ne me fault

Tant suis de douleur esperdue.

Pour estre vostre devenue

Plus que nul qui soit soubs la nue

Toute ma joie me default

Quant de vous seul je pers la veue

De qui tant chiere suis tenue

Mon mallors si tresfort m'assault

Dont je voi bien que je suis nue

De tous biens comme beste mue

A qui de plus riens il me chault

Car je scais bien qu'estre me fault

Seulle de tous biens despourveue.

Quant de vous seul je pers la veue

De qui tant chiere suis tenue

Mon mallors si tresfort m'assault

Qu'a peu que le cuer ne me fault

Tant suis de douleur esperdue.