Anna mater matris Christi

Anna mater matris Christi,

Nos pie considera,

Quae Mariae meruisti

Propinare ubera.

O quam digne veneraris

Ab humano germine,

Quae Mariam mundo paris,

Magno Dei munere.

Nam tu confers spem medelae

Sacro puerperio;

Esto memor clientelae

Huius in exilio.

Anna felix ascendisti

Supra cuncta sidera;

Tu in hora mortis tristi

Nos ab hoste libera.

Sic matrona singularis

Digneris succurrere;

Extans mater salutaris,

Fac nos Christo vivere.

Amen.