And Ye Shall Walk In Silk Attire

And ye sall walk in silk attire,

And siller hae to spare,

Gin ye'll consent to be his bride,

Nor think o' Donald mair.

Oh, wha wad buy a silken gown,

Wi' a poor broken heart,

Or what's to me a siller crown,

Gin frae my love I part?

The mind whase every wish is pure

Far dearer is to me,

And e'er I'm forced to break my faith,

I'll lay me down and die:

For I hae pledged my virgin troth

Brave Donald's fate to share,

And he has gi'en to me his heart

Wi' a' its virtues rare.

His gentle manners wan my heart,

He, gratefu', took the gift;

Cou'd I but think, to seek it back,

It would be waur than theft.

For langest life can ne'er repay

The love he bears to me,

And e'er I'm forced to break my troth,

I'll lay me down and die.