Ad Hesperum

Te, qui nequitias furtaque mollia

et rapta e labiis oscula flammeis

attente specularis

blanda et murmura virginum,

supremum Veneris te genus, Hespere,

oro, qua superas omnia sidera,

o lucem nitidi oris

nigris insere nubibus.

sic ne me Glycerae mellea basia

figentem et Glyceram mellea basia

figentem mihi, matri

morosae timeo indices.

at limen quoties illius obsidet

invisus Bavius, tum precor, Hespere,

tum flamma rutilanti

vincas omnia sidera.