Imitation d'Anacreon

Je suis homme nè pour mourir,

Je suis bien seur que du trespas

Je ne me sçaurois secourir

Que poudre je n'aille là-bas.

Je cognois bien les ans que j'ay,

Mais ceus qui me doibvent venir,

Bons ou mauvais, je ne les sçay,

Ny quand mon age doit finir.

Pource fuyés vous-en, esmoy,

Qui rongés mon coeur à tous cous,

Fuyés vous-en bien loing de moy,

Je n'ay que fair' avecques vous.

Au moins avant que trespasser,

Que je paisse à mon ais' un jour

Jouer, sauter, rir', et dancer,

Avecque Bacchus, et Amour.