Une mousse de Biscaye
Josquin des Prez
Une mousse de Biscaye
L'autre jour pres ung moulin,
Vint à moi sans dire gaire,
Moy hurlant sur mon chemin,
Blanche comme un parchemin,
Je la baisé a mon aise;
El me dist sans faire noise:
« Soau, soau ordonarequin! »
Je luy dis que de Bisquaye
J'estoys son prochain vosin:
« Mecton nous pres ceste haie
En l'ombre soubz l'aubepin:
La parlerons a butin,
Faictes tout a ma requeste! »
Lors feist signe de la teste:
« Soau, soau ordonarequin! »
«Par mon serment, vecy raige!
Ce n'est fran çoys ne latin:
Parlez moy aultre langaige
Et laissez vo bisquaÿn!
Mectons no besongne a fin,
Parlons d'amours, je vous prie! »
Lors me dist, n'en doubtez mye:
« Soau, soau ordonarequin! »
Avoir n'en peuz aultre chose,
Par ma foy, a ce matin,
Fors baisez a bouche close
Et la main sur le tetin:
« A Dieu, petit musequin,
A Dieu soyez, ma popine! »
Lors me dit la bisquaÿne:
« Soau, soau ordonarequin! »