Kuining Chuonrat der Junge

Ich fröwe mich maniger bluomen rôt

die uns der meie bringen wil:

Die stuonden ê in grôzer nôt,

der winter tet in leides vil.

Der mei wils uns ergetzen wol

mit manigem wünneclîchen tage:

des ist diu welt gar fröiden vol.

Waz hilfet mich diu sumerzît

und die vil liehten langen tage?

Mîn trôst an einer frowen lît

von der ich grôzen kumber trage.

Wil sie mir geben hôhen muot,

dâ tuot si tugentlîchen an

und daz mîn fröide wirdet guot.

Swann ich mich von der lieben scheide,

sô muoz mîn fröide ein ende hân.

Owê, sô stirbe ich lîht von leide

daz ich es ie it ir began.

Ichn weiz niht, frowe, waz minne sint:

mich lât diu liebe sêre engelten

daz ich der jâre bin ein kint.