Aubade

Mignonne, levés-vous, vous estes paresseuse,

Ja la gay' Alouette au ciel a fredonné,

Et ja le Rossignol frisquement jargonné,

Dessus l'espine assis, sa complainte amoureuse.

Debout donq, allon voir l'herbelette perleuse,

Et vostre beau rosier de boutons couronné,

Et voz oeillets aimés, ausquels avés donné

Hyer au soir de l'eau, d'une main si songneuse.

Hier en vous couchant, vous me fistes promesse

D'estre plus tost que moy ce matin éveillée,

Mais le sommeil vous tient encor toute sillée:

Ha! je vous puniray du peché de paresse,

Je vois baiser [cent fois vostr' oeil, vostre tetin,

A fin de] vous aprendr' à vous lever matin.