Rex virtutum

Rex virtutum, rex gloriae,

rex insignis victoriae,

Jesu, largitor veniae,

honor coelestis patriae.

Tu fons misericordiae,

tu verae lumen patriae,

pelle nubem tristitiae

dans nobis lucem gloriae.

Coeli cives occurite,

portas vestras atollite,

triumphatori, dicite:

"Ave, Jesu, rex inclyte."

Jesus ad patrem rediit,

coeleste regnum subiit:

cor meum a me transiit,

post Jesum simul abiit.

Quem prosequamur laudibus,

votis, hymnis et precibus:

ut nos donet coelestibus,

cum ipso frui sedibus.

Amen.