Ca' the yowes to the knowes

Hark! the mavis' evening sang

Sounding Clouden's woods amang,

Then a-faulding let us gang,

My bonnie dearie.

Ca' the yowes to the knowes,

Ca' them where the heather grows,

Ca' them where the burnie rows,

My bonnie dearie.

We'll gae down by Clouden side,

Through the hazels, spreading wide

O'er the waves that sweetly glide

To the moon sae clearly.

Ca' the yowes

etc.

Yonder Clouden's silent towers,

Where at moonshine midnight hours

O'er the dewy bending flowers

Fairies dance sae cheery.

Ca' the yowes

etc.

Ghaist nor bogle shalt thou fear;

Thou'rt to Love and Heaven sae dear,

Nocht of ill may come thee near,

My bonnie dearie.

Ca' the yowes

etc.

Fair and lovely as thou art,

Thou hast stown my very heart;

I can die -- but canna part,

My bonnie dearie.

Ca' the yowes

etc.

While waters wimple to the sea;

While day blinks in the lift sae hie;

Till clay-cauld death shall blin' my e'e,

Ye shall be my dearie.

Ca' the yowes

etc.