Sopra l'acqua indormenzada

Coi pensieri malinconici

No te star a tormentar:

Vien con mi, montemo in gondola,

Andaremo fora in mar.

Passaremo i porti e l'isole

Che circonda la cità:

El sol more senza nuvole

E la luna spuntarà.

Oh! che festa, oh! che spetacolo,

Che presenta sta laguna,

Quando tuto xe silenzio,

Quando sluse in ciel la luna;

E spandendo i cavei morbidi

Sopra l'acqua indormenzada,

La se specie, la se cocola,

Come dona inamorada!

Tira zo quel velo e scòndite,

Che la vedo comparir!

Se l'arriva a descoverzarte,

La se pol ingelosir!

Sta baveta, che te zogola

Fra i caveli imbovolai,

No xe turbia de la polvere

De le rode a dei cavai. Vien!

Se in conchigli ai Greci Venere

Se sognava un altro di,

Forse visto i aveva in gondola

Una zogia come ti,

Ti xe bela, ti xe zovene,

Ti xe fresca come un fior;

Vien per tuti la so lagrime;

Ridiadesso e fa l'amor!