Joly Jankyn

“Kyrie, so Kyrie,” Jankyn syngyt merie with “aleyson.”

As I went on Yol Day in our prosessyon

Knew I Joly Jankyn be his merie ton,

Kyrie eleyson.

Jankyn began the Offys on the Yol Day,

And yyt me thynkyt it dos me good,

So merie gan he say:

Kyrie eleyson.

Jankyn red the Pystylful fayre and ful wel,

And yyt me thynkyt it dos me good,

As evere have I sel.

Kyrie eleyson.

Jankyn at the Sanctus crakit a merie note,

And yyt me thynkyt it dos me good:

I payid for his cote.

Kyrie eleyson.

Jankyn at the Agnus beryt the paxbrede;

He twynkelid, but sayd nowt,

And on myn fot he trede.

Kyrie eleyson.

Benedicamus Domino:

Chryst fro schame me schylde;

Deo gracias thereto:

Alas, I go with chylde!

Kyrie eleyson.