Canzone al Principe di Napoli

La bella Margarita

A Napole è figliata,

Già tutta revotata

Se vede sta cetà!

Lo Prencepe che à fatto

È chiatto bello e ttunno,

Pare che miezo munno

Già già sè vò magnà!

Ebbiva Margarita!

Corrimmo ad alluccà!

La cara Principessa

Lu popolo vò bene;

Scordammo guaje e pene,

Aunimmoce mo ccà!

Sarrà mo chisto fatto

Na cosa troppo bella,

De Napole la stella

Pare che vo cagnà!

Nce songo state tante

A ddarce amaro ffele,

Ma mò co Manuele

Chi chiù nce vo pensa?

Lu latte da nutricera

È latte de Nevane

Chist' è Napolitano

De sango e core già!

Vesuvio, Mare e Sole

Faranno po lu riesto:

Currimmo tutte, prieste,

Mettimmoce a allucca

Ebbiva Margarita,

Ebbivo lu Nennillo:

No vaso a pezzechillo

Ve manna sta cetà!