I wett i wär

I wett i wär 's Chopfchüsseli

I ihrem wysse Bett!

Wie wett esi bim Tschüppli näh!

O wänn is au nu chöt!

Das Tschüppli müesst mer gsträhled sy,

Wie wänn's ä Wildchatz hett.

I wett, i wär 's chly Spiegeli,

Wo hangt im Guggehur!

Äs luegt's jo hundertmol meh a,

As 's ganz Dorf d'Chileuhr.

I hett mi müsli, müslistill,

wänn sy mir putzi d'Glasmundur.

's Wychwassertröigli, wär is au!

Äs tünkled d'Finger dri

Und netzt sy Stirne, 's Müli, 's Härz,

Se vil's dra goht verby.

Wie wett em sägne jedi Stund,

Tags und bim Stärneschy.

I wett i wär 's rot Büseli,

Wo uf sym Schlärppli lyt!

He wänn i nu im Stubli wär

D'Wanduhr, die halb verhyt,

Und z'letzt am Änd nu's Guggerli

Im alte Schwarzwaldzyt.