S'Gspüslis Auge

Äugli hät mys Schatzeli

Wien ä Bach wänn's dunkled.

Wänn drus-use d'Stärneli

Still und heimli funkled.

Wänn um's Wasser d'Zitterhälm

Stönd wie Augehöirli;

Wänn's eim aluegt i dr Nacht,

Rüebig, teuff und g'föihrli.

Äugli hät mys Schatzeli

Wie dr Bach wänn's taged,

Wänn drus alli Näbeli

D'Morgelüftli jaged.

Wä'me alls im Bach cha gseh,

Himmel, Wält und Sunne,

Blöiss die arge Fischli nüd

Und'rem Bachport unne.