Chanson VI

Dieu! qu'il la fait bon regarder!

La gracieuse bonne et belle;

Pour les grans biens que sont en elle

Chascun est prest de la loüer.

Qui se pourroit d'elle lasser?

Tous jours sa beauté renouvelle.

Dieu! qu'il la fait bon regarder!

La gracieuse bonne et belle!

Par deçà, ne de là, la mer

Ne sçay dame ne damoiselle

Qui soît en tous bien parfais telle.

C'est ung songe que d'i penser:

Dieu! qu'il la fait bon regarder!