S'il a dit vrai

S'il a dict vray, seiche pour moy l'ombrage

De l'arbre sainct, ornement de mes vers.

Mon nom sans bruit erre par l'univers,

Pleuve sur moy du ciel toute la rage.

S'il a dict vray, de mes soupirs l'orage,

De cruauté les durs rochers couvers,

De desespoir les abismes ouvers,

Et tout peril conspire en mon naufrage.

S'il a menti, la blanche main d'yvoire

Ceigne mon front des fueilles, que j'honnore:

Les Astres soient les bornes de ma gloire.

Le ciel bening me decouvre sa trace:

Voz deux beaux yeux, deux flambeaux que j'adore,

Guident ma nef au port de vostre grace.