Oh si i'estois en ce beau sein rauie

Oh si i'estois en ce beau sein rauie

De celui là pour lequel vois mourant:

Si auec lui viure le demeurant

De mes cours iours ne m'empeschoit enuie:

Si m'acollant me disoit, chère Amie,

Contentons nous l'un l'autre, s'asseurant

Que ia tempeste, Euripe, ne Courant

Ne nous pourra desioindre en notre vie:

Si de mes bras le tenant acollé,

Comme du Lierre est l'arbre encercelé,

La mort venait, de mon aise enuieuse:

Lors que souef plus il me baiseroit.

Et mon esprit sur ses leures fuiroit.

Bien ie mourrois, plus que viuante, heureuse.