Ah! s'moun cor avié d'alo

Ah! se moun cor avié d'alo,

Sus toun còu, sus toun espalo,

Voularié tout en coumbour,

O mignoto! à toun auriho

Te dirié de meraviho,

De meraviho d'amour.

Ah! se moun cor avié d'alo,

Subre ti bouqueto palo

Voularié coume un perdu;

Moun cor te farié, chatouno,

Cènt poutoun e cènt poutouno;

Parlarié, parlarié plu!

Pieta! moun cor n'a ges d'alo!

Lou làngui, la fre lou jalo:

Té! lou vaqui sus ma man;

Pren-lou dins la tiéuno, o bello!

Coume un agnèu moun cor bèlo,

E plouro coume un enfant.