Qui dira ?

Qui dira ma robe fourrée

De la belle pluie dorée,

Qui Daphnes enclose esbranla:

Je ne sçay rien moins, que celà.

Qui dira, qu'à plusieurs je tens

Pour en avoir mon passetemps,

Prenant mon plaisir çà, et là:

Je ne sçay rien moins, que celà.

Qui dira, que t'ay revelé

Le feu long temps en moi celé

Pour en toy veoir si force il a:

Je ne sçay rien moins, que celà.

Qui dira, que d'ardeur commune,

Qui les Jeunes gentz importune,

De toy je veulx, et puis holà:

Je ne sçay rien moins, que celà.

Mais qui dira, que la Vertu,

Dont tu es richement vestu,

En ton amour m'estincelà:

Je ne sçay rien mieux, que celà.

Mais qui dira que d'amour saincte

Chastement au cueur suis attaincte,

Qui mon honneur onc ne foulà:

Je ne sçay rien mieux, que celà.