Därf i's Diandl liabn?

I bin jüngst vawichn

hin zan Pfoarra g'schlich'n.

Därf i's Diandl liabn?

„Untersteh dih nöt, bei meina Seel,

wann du's Diandl liabst, so kummst in d'Höhl.“

Bin i vull Valongan

zua da Muata gongan.

Därf i's Diandl liabn?

„O mei liaba Schatz, es iss noh z'fruah,

nach fuchzehn Jahrln erst, mei liaba Bua!“

Woar in gross'n Nötn,

hon in Vodan bett'n.

Därf i's Diandl liabn?

„Dunners Schlangl!“ schreit er in sein Zurrn,

„willst mein Stöckn kost'n, kannst as tuan!“

Wusst frei nix anz'fongan,

bin zan Herrgott gongan.

Därf i's Diandl liabn?

„Ei jo freili,“ sogt er und hot g'lacht,

„wegn an Büaberl han is Diandl g'mocht!“