Olim lacus colueram

Olim lacus colueram

olim pulcher extiteram,

dum cignus ego fueram.

Miser, miser!

modo niger

et ustus fortiter!

[Girat, regirat furcifer,

propinat me nunc dapifer,

me rogus urit fortiter!]

Miser, miser!

modo niger

et ustus fortiter!

Mallem in acquis vivere

nudo semper sub aere,

quam in hoc mergi pipere:

Miser, miser!

modo niger

et ustus fortiter!

Eram nive candidior,

quavis ave formosior,

modo sum corvo nigrior:

Miser, miser!

modo niger

et ustus fortiter!

Nunc in scutella iaceo,

et volitare nequeo,

dentes frendentes video.

Miser, miser!

modo niger

et ustus fortiter!