Autre bayser

Quand ton col de couleur de rose

Se donne à mon embrassement,

Et ton œil languist doulcement

D'une paupière à demy close,

Mon ame se fond du désir,

Dont elle est ardentement pleine,

Et ne peult souffrir à grand' peine

La force d'un si grand plaisir.

Puis quand j'approche de la tienne

Ma lèvre, et que si près je suis,

Que la fleur recuillir je puis

De ton haleine Ambroisienne:

Quand le soupir de ces odeurs

Ou noz deux langues qui se jouent,

Moitement folastrent et nouent,

Évente mes doulces ardeurs,

Il me semble estre assis à table

Avec les Dieux, tant suis heureux,

Et boire à longs traicts savoureux

Leur doulx breuvage délectable.

Si le bien qui au plus grand bien

Est plus prochain, prendre on me laisse,

Pourquoy ne permets-tu, maistresse,

Qu'encores le plus grand soit mien?

As-tu peur que la jouissance

D'un si grand heur me face Dieu?

Et que sans toy je vole au lieu

D'éternelle resjouissance?

Belle, n'aye peur de cela,

Par tout où sera ta demeure,

Mon ciel jusqu'à tant que je meure,

Et mon paradis sera là.