À la tourterelle

R.

Que dis tu, que fais tu, pensive tourterelle,

Dessus cest arbre sec?

T.

Helas je me lamente.

R.

Et pourquoi, di-le moi?

T.

De ma compagne absente,

Plus chere que ma vie.

R.

En quelle part est-elle?

T.

Un cruel oyselleur, par glueuse cautelle

L'a prise et l'a tuée, et nuict et jour je chante

Son trespas dans ces bois, nommant la mort méchante

Qu'elle ne m'a tuée avecques ma fidelle.

R.

Voudrois-tu bien mourir avecques ta compaingne?

T.

Oui, car aussi bien je languis de douleur,

Et toujours le regret de sa mort m'acompaingne.

R.

O gentils oysellets, que vous estes heureus

D'aimer si constamment, qu'heureus est vôtre coeur,

Qui, sans point varier, est tousjours amoureus!