Chanson

Demandes-tu, chere Marie,

Quelle est pour toy ma pauvre vie?

Je jure par tes yeux qu'elle est

Telle qu'ordonner te la plaist.

Pauvre, chetive, langoureuse,

Dolente, triste, malheureuse:

Et tout le mal qui vient d'amour,

Ne m'abandonne nuict ny jour!

Apres demandes-tu, Marie,

Quels compaignons suivent ma vie?

Suivie en sa fortune elle est

De tels compaignons qu'il te plaist.

Ennuy, travail, peine, tristesse,

Larmes, souspirs, Sanglots, destresse,

Et tout le mal qui vient d'amour,

Ne m'abandonne nuict ny jour.

Voyla comment pour toy, Marie,

Je traine ma chetive vie,

Heureux du mal que je reçoy

Pour t'aimer cent fois plus que moy.