Der Sennerin Morgenlied

Stand uf, stand uf, mi Hirtebueb,

Stand uf, es isch scho Zit!

Die Sunne chunnt und d'Hätzle rüeft,

Der Nebel vo danne fliht.

E Glöckli dört, e Glöckli hie,

Und d'Senne müen brav schaffig sy --

Stand uf, stand uf, mi Hirtebueb,

Verschlof der Morge nit!

E iungis Meidli bini no,

Jo weger e lustig Bluet,

I tanz im Schatte wiene Vögli im Laub,

Zwei Züpfeli unterem Huet.

Und wenni sing, sen isch's mer iust,

Und was i thue, 's g'schicht mir Lust --

Stand uf, stand uf, mi Hirtebueb,

Stand uf, i bi Der guet.

Im Büebli sägi allizit io,

Im Müetterli allizit nei.

Zwor balgt's und spricht, sell cha nit sy,

De muesch no bliben ellei!

Und 's Müetterli isch doch iung au gsi,

Jung will au sy's frumm Töchterli --

Stand uf, stand uf, mi Hirtebueb,

Gell, nümme blibi dehei!