S'il vous plaist vendre vos baisiers

S'il vous plaist vendre vos baisiers,

J'en achatteray voulentiers,

Et en aurés mon cueur en gage,

Pour les prandre par héritage,

Par douzaines, cens ou milliers.

Ne les me vendez pas si chiers

Que vous fériés à estrangiers;

En me recevant en hommaige,

S'il vous plaist vendre vos baisiers,

J'en achatteray voulentiers,

Et en aurez mon cueur en gage

Mon vueil et mon désir entiers

Sont vostres, maugré tous dangiers,

Faittes, comme loyalle et sage,

Que pour mon guerdon et partage,

Je soye servy des premiers.

S'il vous plaist vendre vos baisiers.