Wo i schlafen möcht'

I schlaf nit gern in Heu;

is's alt, gibt's Viecher drein,

und is's ganz frisch und neu,

tuat oan vor G'ruch der Schädel weh!

I schlaf nit gern in Stroh,

wal man bald da, bald dort sich sticht,

und jed's Mal wird ma munter,

das is gar a dumme G'schicht!

I schlaf nit gern in Gras,

wann's no so pelzi is und dicht;

wann ma aufsteht in da Fruah,

da is ma waschelnaß im G'sicht!

I schlaf nit gern in Bett,

wal i allmal gern lufti bin,

des G'wammswerch g'fallt mir gar nit,

's wird oan gar so haß dad'rin!

„Wo schlafst denn nachher gern?“

hat z'naxt mi unser Pfarrer g'fragt;

hab's aber'n geistli'n Herrn,

obwohl i's wissen tua, nit g'sagt.

I woaß wohl: Is ma miad,

so kann ma überall schlafen guat;

's macht's aber mei Geblüat,

dass si's bei mir halt ninderscht tuat!

I schlaf nit gern alloan,

ja das is mei ganze Not!

O steh mir bei, du lieber Gott!

Mei Mirzl muaß si zu mir leg'n,

sonst stirb i mi no z'Tod!