Depuis qu'amour cruel

Depuis qu'Amour cruel empoisonna

Premièrement de son feu ma poitrine,

Tousiours brulay de sa fureur diuine,

Qui un seul iour mon cœur n'abandonna.

Quelque trauail, dont assez me donna,

Quelque menasse & procheine ruïne:

Quelque penser de mort qui tout termine,

De rien mon cœur ardent ne s'estonna.

Tant plus qu'Amour nous vient fort assaillir,

Plus il nous fait nos forces recueillir,

Et tousiours frais en ses combats fait estre:

Mais ce n'est pas qu'en rien nous fauorise,

Cil qui les Dieus & les hommes mesprise:

Mais pour plus fort contre les fors paroitre.