À Venus

Rendez à l'or cete couleur, qui dore

Ces blonds cheveux, rendez mil' autres choses:

A l'orient tant de perles encloses,

Et au Soleil ces beaux yeulx, que j'adore.

Rendez ces mains au blanc yvoire encore,

Ce seing au marbre, et ces levres aux roses,

Ces doulx soupirs aux fleurettes decloses,

Et ce beau teint à la vermeille Aurore.

Rendez aussi à l'Amour tous ses traictz,

Et à Venus ses graces, et attraictz:

Rendez aux cieulx leur celeste harmonie.

Rendez encor' ce doulx nom à son arbre,

Ou aux rochers rendez ce coeur de marbre,

Et aux lions cet' humble felonnie.