Ich wil allen liuten
R. Spring
Ich wil allen lúten
Betúten
Mins herzen klage
Und wie grossen kumber
Ich tumber
Nu trage,
Wie mich sorge twinget,
Und singet
Doch mir der lip.
Seht! Das můs ich liden
Durch míden
Ein wip.
Des můs ich den jamer schriken
Leider! undertenig sin.
Ich lige in ir minnen striken,
Das ist an mir worden schin.
Si kan senden smerzen
Us herzen
Vertriben
Wol:
Rose ob allen wiben
Man si nennen sol!
Wa ist nu dú schoene?
Ich doene
Und nige ir gar.
Ich wil aber grůssen
Die sůssen
(Nement war!)
Schone mit gesange.
Swie lange
Ich ir froemde si,
Doch so hat ir jugende
Vil tugende;
Da bi
Hat si gůte ein michel wunder
In den herzen zaller stunt;
Und si doch vorus besunder
Mir das herze hat verwunt.
Si kan senden smerzen
Us herzen
Vertriben
Wol:
Rose ob allen wiben
Man si nennen sol!
Wenne sun ir ougen
Mir tougen
Ze blike varn,
Und dú sůsse junge
Mir swunge
Den arn,
Und mich umbevienge:
So gienge
Mir sorgen hin;
Seht! so wolt ich scheiden
Von leiden
Den sin.
Wafena, der lieben stunde!
Wenn sol ich die geleben,
Das ich von ir roten munde
Solte ein lieblich kússen nemen.
Si kan senden smerzen
Us herzen
Vertriben
Wol:
Rose ob allen wiben
Man si nennen sol!