Deus ou trois fois bienheureus le retour

Deus ou trois fois bienheureus le retour

De ce cler Astre, & plus heureus encore

Ce que son œil de regarder honore.

Que celle là receuroit un bon iour,

Qu'elle pourrait se vanter d'un bon tour

Qui baiseroit le plus beau don de Flore,

Le mieus sentant que iamais vid Aurore,

Et y ferait sur ses leures seiour!

C'est à moy seule à qui ce bien est du,

Pour tant de pleurs & tant de tems perdu:

Mais le voyant, tant lui feray de feste,

Tant emploiray de mes yeus le pouuoir,

Pour dessus lui plus de crédit auoir,

Qu'en peu de temps feray grande conqueste.