Je suis tellement amoureux

Je suis tellement amoureux,

Qu'au vray raconter je ne puis

Ny où je suis, ne qui je suis,

Ny combien je suis malheureux.

J'ay pour mon hoste nuict et jour,

Comme un tigre, un cruel esmoy

Qui va pratiquant dessus moy

Toutes les cruautez d'Amour.

Et si mon cœur ne peut s'armer

Contre l'œil qui le navre à tort:

Car, plus il me donne la mort,

Plus je suis contraint de l'aimer.