La Belle au Rossignol

Volez vous que je vous chant

Un son d'amors avenant?

Vilain ne fist mie,

Ainz le fist un chevalier

Souz l'ombre d'un olivier

Entre les braz s'amie.

Chemisete avoit de lin

En blanc peliçon hermin

Et bliaut de soie,

Chauces ot de jaglobai

Et sollers de flors de mai,

Estroitement chauçade.

Cainturete avoit de fueille

Qui verdist quant li tens mueille;

D'or hert boutonade.

L'aumosniere estoit d'amor;

Li pendant furent de flor,

Par amors fut donade.

Si chevauchoit une mule;

D'argent ert la ferreure,

La sele ert dorade;

Seur la crope par derrier

Avoit planté trois rosiers

Por fere li honbrage.

Si s'en vet aval la pree;

Chevaliers l'ont encontree,

Biau l'ont saluade:

"Bele, dont estes vous nee?

-De France sui, la löee,

Du plus haut parage.

Li rossignous est mon pere

Qui chante seur la ramee

El plus haut boscage;

La seraine, ele est ma mere

Qui chante en la mer salee

El plus haut rivage.

-Bele, bon fussiez vous nee,

Bien estes enparentee

Et de haut parage;

Pleüst a Dieu nostre pere

Que vous me fussiez donee

A fame espousade."