Hélas ! Combien de jours !

Helas! combien de jours, helas! combien de nuicts

J'ay vescu loing du lieu, où mon cœur fait demeure!

C'est le vingtieme jour que sans jour je demeure,

Mais en vingt jours j'ay eu tout un siecle d'ennuis.

Je n'en veux mal qu'à moy, malheureux que je suis,

Si je souspire en vain, si maintenant j'en pleure;

C'est que mal advisé je laissay en mal' heure,

Celle la que laisser nulle part je ne puis.

J'ay honte que desja ma peau decoulouree

Se voit par mes ennuis de rides labouree:

J'ay honte que desja les douleurs inhumaines

Me blanchissent le poil sans le congé du temps.

Encor moindre je suis au compte de mes ans,

Et desja je suis vieux au compte de mes peines.