Belle qui tient ma vie

Belle qui tiens ma vie

Captiue dans tes yeulx,

Qui m'a l'ame rauie

D'un soubz-ris gracieux,

Viens tost me secourir

Ou me fauldra mourir.

Pourquoy fuis tu mignarde

Si ie suis pres de toy,

Quand tes yeulx ie regarde

Ie me perd dedans moy

Car tes perfections

Changent mes actions.

Tes beautéz & ta grace

Et tes diuins propos.

Ont eschauffé la glace

Qui me geloit les os,

Et ont remply mon cœur

D'une amoureuse ardeur.

Mon ame souloit estre

Libre de passions,

Mais amour s'est faict maistre

De mes affections,

Et à mis soubs sa loy

Et mon cœur & ma foy.

Approche donc ma belle

Approche toy mon bien,

Ne me sois plus rebelle

Puis que mon cœur est tien,

Pour mon mal appaiser,

Donne moy un baiser.

Ie meurs mon Angelette

Ie meurs en te baisant,

Ta bouche tant doucette

Va mon bien rauissant

À ce coup mes espritz

Sont tous d'amour espris.

Plustost on verra l'Onde

Contre mont reculer

Et plustost l'œil du monde

Cessera de brusler,

Que l'amour qui m'époinct

Decroisse d'un seul poinct.