À Saint-Blaise

Sainct Blaise, qui vis aux cieux

Comme un ange precieux,

Si de la terre où nous sommes,

Tu entens la voix des hommes,

Recevant les vœux de tous,

Je te prie, escoute-nous.

Ce jourd'huy que nous faisons

A ton autel oraisons

Et processions sacrées

Pour nous, nos bleds et nos prées,

Chantant ton hymne à genous:

Je te prie, escoute-nous.

Chasse loin de nostre chef

Toute peste et tout meschef

Que l'air corrompu nous verse,

Quand la main de Dieu diverse

Respand sur nous son courrous:

Je te prie, escoute-nous.

Garde nos petits troupeaux,

Laines entieres et peaux,

De la ronce dentelée,

De tac et de clavelée,

De morfonture et de tous:

Je te prie, escoute-nous.

Que tousjours accompagnez

Soient de mastins rechignez,

Le jour allant en pasture,

Et la nuict en leur closture,

De peur de la dent des loups:

Je te prie, escoute-nous.

Si le loup de sang ardent

Prend un mouton en sa dent,

Quand du bois il sort en queste,

Huans tous aprés la beste,

Que soudain il soit recous:

Je te prie, escoute-nous.

Garde qu'en allant aux champs,

Les larrons qui sont meschans,

Ne desrobent fils ne mere;

Garde-les de la vipere

Et d'aspics au ventre rous:

Je te prie, escoute-nous.

Que ny sorciers ny poison

N'endommagent leur toison

Par parole ou par breuvage;

Qu'ils passent l'esté sans rage,

Que l'autonne leur soit dous:

Je te prie, escoute-nous.

Garde-nous de trop d'ardeurs

Et d'excessives froideurs;

Donne-nous la bonne année,

Force bleds, force vinée,

Sans fiévre, rongne, ne clous:

Je te prie, escoute-nous.

Garde nos petits vergers

Et nos jardins potagers,

Nos maisons et nos familles,

Enfans, et femmes, et filles,

Et leur donne bons espous:

Je te prie, escoute-nous.

Garde poulles et poussins

De renards et de larcins;

Garde sauves nos avettes;

Qu'ils portent force fleurettes

Tousjours en leurs petits trous:

Je te prie, escoute-nous.

Fay naistre force boutons

Pour engraisser nos moutons,

Et force fueille menue,

Que paist la troupe cornue

De nos chévres et nos boucs:

Je te prie, escoute-nous.

Chasse la guerre bien loing;

Romps les armes dans le poing

Du soldat qui frappe et tue

Celuy qui tient la charrue,

Mangeant son bien en deux coups:

Je te prie, escoute-nous.

Que le plaideur grippe-tout,

Par procés qui sont sans bout,

N'enveloppe le bon homme

Qui chiquanant se consomme,

Puis meurt de faim et de pous:

Je te prie, escoute-nous.

Que l'impudent usurier,

Laissant l'interest premier,

N'assemble point sans mesure

Usure dessus usure,

Pour ravir son petit clous:

Je te prie, escoute-nous.

Garde nos petits ruisseaux

De souillure de pourceaux,

Naiz pour engraisser leur pance;

Pour eux tombe en abondance

Le glan des chesnes secous:

Je te prie, escoute-nous.

Nos genices au printemps

Ne sentent mouches ne tans,

Enflent de laict leurs mammelles;

Que pleines soient nos faiscelles

De fourmages secs et mous:

Je te prie, escoute-nous.

Nos bouviers sans murmurer

Puissent la peine endurer,

Bien repeus à nostre table;

Soient les bœufs dedans l'estable

Tousjours de fourrages saouls:

Je te prie, escoute-nous.

Chasse loin les paresseux;

Donne bon courage à ceux

Qui travaillent, sans blesseure

De congnée, et sans morseure

De chiens enragez et fous:

Je te prie, escoute-nous.

Bref, garde-nous de terreurs,

Et de paniques fureurs,

Et d'illusion estrange,

Et de feu sacré, qui mange

Membres, arteres et pouls:

Je te prie, escoute-nous.

Donne que ceux qui viendront

Prier ton nom, et rendront

A ton autel leurs offrandes,

Jouissent de leurs demandes,

De tous leurs pechez absous:

Je te prie, escoute-nous.

Sainct Blaise, qui vis aux cieux

Comme un ange precieux,

Si de la terre où nous sommes,

Tu entens la voix des hommes,

Recevant les vœux de tous,

Je te prie, escoute-nous.