Chasse

Diane estant en l'espesseur d'un bois,

Apres auoir mainte beste assenee.

Prenait le frais, de Nynfes couronnée:

I'allois resuant comme fay maintefois,

Sans y penser: quand i'ouy une vois,

Qui m'apela, disant, Nynfe estonnee,

Que ne t'es tu vers Diane tournee?

Et me voyant sans arc & sans carquois,

Qu'as tu trouué, ô compagne, en ta voye,

Qui de ton arc & flesches ait fait proye?

Ie m'animay, respons ie, à un passant.

Et lui getay en vain toutes mes flesches

Et l'arc après: mais lui les ramassant

Et les tirant me fit cent & cent bresches.