Printemps

Pour le retour du Soleil honorer,

Le Zephir, l'air serein lui apareille:

Et du sommeil l'eau & la terre esueille,

Qui les gardoit l'une de murmurer

En dous coulant, l'autre de se parer

De mainte fleur de couleur nompareille.

Ia les oiseaus es arbres font merueille,

Et aus passans font l'ennui moderer:

Les Nynfes ia en mile ieus s'esbatent

Au cler de Lune, & dansans l'herbe abatent:

Veut tu Zephir de ton heur me donner,

Et que par toy toute me renouuelle?

Fay mon Soleil deuers moy retourner.

Et tu verras s'il ne me rend plus belle.