Lauraires e trobaires

La tèrra se durbis als afogats gasèls.

L'etèrna nòvia ofrís a lor esquiçadura,

per l'obrança d'amor e de congrelhadura

sos popèls tant molzuts e etèrnament piucèls.

E tram totes los camps e jos totes los cèls,

sul grand rugle virant que'l l'Astràs escaudura,

es lo mème òbra santa e la mèma ondradura

de parelhs afanats engarlandats d'ausèls.

Enrengatz-vos, bordons! La rega del Lauraire

E la d'aquel que ten lo calam per araire

pòrtan un nom pariu en parlar occitan,

e l'Estròfa es atal sòrre de la Mossada:

Trobaires e Boièrs fan levar, en cantant,

lo doble noiriment de vida e de pensada.