Pucelle, en qui la triple grace

Pucelle, en qui la triple grace

Prodige son rare tresor:

Pucelle, qui d'entour ta face

Descoches mille fleches d'or:

Pucelle, qui des ta naissance

Receuz par grand faveur des dieux

L'honneur la beauté la puissance

Qui t'acompagne et en tout lieu:

Vy sans jamais estre amortie

Et ton nom soit illustre et cler

Qui dit que du roc est bastie

Que force ne peut esbranler.

Et ton roc sois tousjours propice

O roc sur tous plaisant et beau,

Soutenant ce noble edifice

Seul ornement de ton coupeau.