Sur moy, Seigneur, ta main pesante et dure

Sur moy, Seigneur, ta main pesante et dure

Tu as jetté, las! tu m'as abatu:

Tant que plus n'ay ny force ny vertu

Pour resister aux tormens que j'endure.

Mais quoy, je sçay que tu as soin et cure

De moy ton cerf de tes verges battu

Et en ces maux dont je suis combattu

Tant seullement ta grand bonté m'asseure.

Pourtant aussi ô Dieu doux et humain

Ma cause et moy je remez en ta main

Soubz la faveur de ta douce clemence,

Mais attendant que ta sainte douceur

Face une fin à ma triste langueur,

Je te supply donne moy patience.