D'un abusé je ne seroy la fable

D'un abusé je ne seray la fable,

Fable future au peuple survivant,

Si ma raison allait bien ensuivant

L'arrest fatal de ta voix veritable,

Chaste prophete, et vrayment pitoyable,

Pour m'advertir tu me predis souvent,

Que je mourray, Cassandre, en te servant:

Mais le malheur ne te rend point croyable.

Car ton destin qui cèle mon trespas,

Et qui me force à ne te croire pas,

D'un faux espoir tes oracles me cache.

Et si voy bien, veu l'estat où je suis,

Que tu dis vray; toutesfois je ne puis

D'autour du col me denouer l'attache.