Si j'estois Jupiter Sinope vous seriez

Si j'estois Jupiter, Sinope, vous seriez

Mon espouse Junon: si j'estois Roy des ondes,

Vous seriez ma Thétys, Roine des eaux profondes

Et pour vostre maison l'Océan vous auriez:

Si la terre estoit mienne avec moy vous tiendriez

L'empire de la terre aux mammelles fecondes,

Et dessus une coche en belles tresses blondes

Par le peuple en honneur déesse vous iriez.

Mais je ne suis pas Dieu et si ne le puis estre,

Pour telles dignitez le ciel ne m'a fait naistre,

Mais je voudrois avoir changé mon bonnet rond,

Et vous avoir chez moy pour ma chere espousée:

Toute ainsi que la nege au doux soleil se fond

Je me fondrois en vous d'une douce rousée.