S'il y a quelque fille en toute la contrée

S'il y a quelque fille en toute une contrée,

Qui soit inexorable, inhumaine et cruelle,

Tousjours elle est de moy pour dame rencontrée,

Et tousjours le malheur me fait serviteur d'elle.

Mais si quelq'une est douce honneste aimable et belle,

La prinse en est pour moy tousjours desesperée:

J'ay beau estre courtois jeune accort et fidelle,

Elle sera tousjours d'un sot enamourée.

Sous tel astre malin je nasquis en ce monde!

Voyla que c'est d'aimer: ceux qui ont merité

D'estre recompensez sont en douleur profonde:

Et le sot volontiers est tousjours bien traité.

O traistre et lasche Amour que tu es malheureux!

Malheureux est celuy qui devient amoureux.