Chanson, voici le jour

Chanson, voici le jour

Ou celle la qui la terre decore,

Et que mon oeil idolatre, & adore,

Vint en ce beau sejour.

Le ciel d'amour ataint

Ardant de voir tant de beautés l'admire,

Et se courbant desus sa face, mire

Tout l'honneur de son taint.

Car les divins flambeaus,

Grandeur, vertu, les amours, & les graces

Lui firent don quand ell'vint en ces places

De leurs presens plus beaus,

Affin que par ses yeus

Tout l'imparfait de ma jeunesse folle

Fust corrigé, & qu'elle fust l'idole

Pour m'avoier au mieus.

Heureus jour retourné,

A tout jamais j'aurai de toi memoire,

Et d'an, en an, je chanterai la gloire

De l'honneur en toi né.

Sus page vistement

Donne ma lire, affin que sur sa chorde

D'un pouce dous je marie & accorde

Ce beau jour sainctement.

Sème par la maison

Tout le tresor des prez & de la pleine,

Le lis, la rose, & cela dond est pleine

La nouvelle saison:

Et crie au temple aussi,

Que le soleil ne vit oncques journée

Qui fust de gloire, & d'honneur tant ornée

Comme il voit ceste ci.