Pour estre en vain tes beaux soleils aimant

Pour estre en vain tes beaux soleils aimant,

Non pour ravir leur divine etincelle,

Contre le roc de ta rigueur cruelle

Amour m'attacheà mille clous d'aimant.

En lieu d'un Aigle, un Soin horriblement

Claquant du bec et tresmoussant de l'aisle,

Ronge, goulu, ma poitrine immortelle

Par un desir qui naist journellement.

Mais de cent maux, et de cent que j'endure,

Fiché cloué dessus la rigueur dure,

Le plus cruel me seroit le plus dous,

Si j'esperois apres un long espace

Venir à moy l'Hercule de ta grace,

Pour delacer le moindre de mes nouds.