Amour archer

Amour archer d'une tirade ront

Cent traitz sur moy, et si ne me conforte

D'un seul espoir, celle pour qui je porte

Le cuoeur aux yeulx, les pensers sus le front.

D'un Soleil part la glace qui me fond,

Et m'esbays que ma froydeur n'est morte

Au feu d'un oeil, qui d'une flamme accorte

Brulle mon cuoeur d'un ulcere profond.

En tel estat je voy languir ma vie,

Qu'aux plus chetifz ma langueur porte envie,

Tant le mal croist et le cuoeur me deffault:

Mais la douleur qui plus comble mon ame

D'un vain espoyr, c'est qu'Amour et Madame

Scavent mon mal, et si ne leur en chault.