Heureuse fut l’estoille fortunée

Heureuse fut l'estoile fortunée,

Qui d'un bon œil ma maistresse aperceut:

Heureux le bers, et la main qui la sçeut

Emmaillotter, le jour qu'elle fut née.

Heureuse fut la mammelle en-mannée

De qui le lait premier elle reçeut:

Et bien-heureux le ventre qui conceut

Si grand' beauté de si grands dons ornée!

Heureux les champs qui eurent cet honneur

De la voir naistre, et de qui le bon-heur

L'Inde et l'Egypte heureusement excelle!

Heureux le fruit dont grosse elle sera,

Mais plus heureux celuy qui la fera

Et femme et mere, en lieu d'une pucelle!